關於我們

良心同行 齊上齊落

彰顯公義、追尋真相、互相扶持,呢啲都係今日你同我喺亂世堅持做嘅事,亦係香港人珍重嘅價值。

《香港良心Guide》成立嘅目的,正正就係希望同路人可以唔需要瞻前顧後,繼續憑良心彰顯香港人嘅核心價值。透過提供平台搜尋黃店、企業合作,令良心市民可以方便咁喺良心店消費,良心店又可以推出各種支援回饋良心市民,令良心經濟圈成為香港人其中一個主流消費模式。長遠而言,我哋更加希望令一啲小店得到更多支持同關注,推廣香港本土文化同情懷。

「重Fact Check」

經有心人每間每戶咁Fact Check,喺唔接受「聽講」嘅情況下,我哋根據各媒體、圖片,搜羅出超過3500間各行各業嘅良心商店。我哋亦希望用家可以知道每間店舖做過嘅好人好事,所以亦喺網頁設置fact checked嘅內容,俾用家一覽。經過整合,希望方便香港市民作出正確嘅消費選擇。

「撐黃」

喺唔增加社會撕裂,又可以更有效支持良心商店嘅前提下,我哋無特別主張「罷藍」,但希望喺生活所有範疇「撐黃」。雖然我哋未能透過選票完全表達我哋嘅意見,但我哋可以用鈔票表達民意,而「撐黃」就係一種表現。同時,只要我哋每一個喺生活上有意識咁支持良心商店,市場自然去蕪存菁。

「各行各業」

講起黃店,唔少人會即刻諗起各式各樣嘅食肆,但有好多其他行業就被忽略。我哋特別希望透過唔同形式嘅宣傳,將良心生活帶到生活各個層面,令各行各業嘅同路人都得到支持。令到每個人都可以跟從本心,彰顯人性光輝嘅一面。

今日香港,好多人會話我哋係被煽動。無錯,我哋就係被我哋嘅良心煽動,我哋係《香港良心Guide》。